פרק ו'
א לַמְנַצֵּחַ בִּנְגִינוֹת עַל־הַשְּׁמִינִית מִזְמוֹר לְדָוִד:
ב ה' אַל־בְּאַפְּךָ תוֹכִיחֵנִי וְאַל־בַּחֲמָתְךָ תְיַסְּרֵנִי:
ג חָנֵּנִי ה' כִּי אֻמְלַל אָנִי רְפָאֵנִי ה' כִּי נִבְהֲלוּ עֲצָמָי:
ד וְנַפְשִׁי נִבְהֲלָה מְאד וְאַתָּה ה' עַד־מָתָי:
ה שׁוּבָה ה' חַלְּצָה נַפְשִׁי הוֹשִׁיעֵנִי לְמַעַן חַסְדֶּךָ:
ו כִּי אֵין בַּמָּוֶת זִכְרֶךָ בִּשְׁאוֹל מִי יוֹדֶה־לָּךְ:
ז יָגַעְתִּי בְאַנְחָתִי אַשְׂחֶה בְכָל־לַיְלָה מִטָּתִי בְּדִמְעָתִי עַרְשִׂי אַמְסֶה:
ח עָשְׁשָׁה מִכַּעַס עֵינִי עָתְקָה בְּכָל־צוֹרְרָי:
ט סוּרוּ מִמֶּנִּי כָּל־פּעֲלֵי אָוֶן כִּי־שָׁמַע ה' קוֹל בִּכְיִי:
י שָׁמַע ה' תְּחִנָּתִי ה' תְּפִלָּתִי יִקָּח:
יא יֵבשׁוּ וְיִבָּהֲלוּ מְאד כָּל־איְבָי יָשֻׁבוּ יֵבשׁוּ רָגַע:
פרק יג
א לַמְנַצֵּחַ מִזְמוֹר לְדָוִד:
ב עַד־אָנָה ה' תִּשְׁכָּחֵנִי נֶצַח עַד־אָנָה תַּסְתִּיר אֶת־פָּנֶיךָ מִמֶּנִּי:
ג עַד־אָנָה אָשִׁית עֵצוֹת בְּנַפְשִׁי יָגוֹן בִּלְבָבִי יוֹמָם עַד־אָנָה יָרוּם איְבִי עָלָי:
ד הַבִּיטָה עֲנֵנִי ה' אֱלֹקי הָאִירָה עֵינַי פֶּן־אִישַׁן הַמָּוֶת:
ה פֶּן־יאמַר איְבִי יְכָלְתִּיו צָרַי יָגִילוּ כִּי אֶמּוֹט:
ו וַאֲנִי בְּחַסְדְּךָ בָטַחְתִּי יָגֵל לִבִּי בִּישׁוּעָתֶךָ אָשִׁירָה לַה' כִּי גָמַל עָלָי:
פרק כ'
לַמְנַצֵּחַ מִזְמוֹר לְדָוִד:
ב יַעַנְךָ ה' בְּיוֹם צָרָה יְשַׂגֶּבְךָ שֵׁם אֱלֹקי יַעֲקב:
ג יִשְׁלַח עֶזְרְךָ מִקּדֶשׁ וּמִצִּיּוֹן יִסְעָדֶךָּ:
ד יִזְכּר כָּל־מִנְחֹתֶיךָ וְעוֹלָתְךָ יְדַשְּׁנֶה סֶּלָה:
ה יִתֶּן־לְךָ כִלְבָבֶךָ וְכָל־עֲצָתְךָ יְמַלֵּא:
ו נְרַנְּנָה בִּישׁוּעָתֶךָ וּבְשֵׁם־אֱלֹקינוּ נִדְגּל יְמַלֵּא ה' כָּל־מִשְׁאֲלוֹתֶיךָ:
ז עַתָּה יָדַעְתִּי כִּי הוֹשִׁיעַ ה' מְשִׁיחוֹ יַעֲנֵהוּ מִשְּׁמֵי קָדְשׁוֹ בִּגְבוּרוֹת יֵשַׁע יְמִינוֹ:
ח אֵלֶּה בָרֶכֶב וְאֵלֶּה בַסּוּסִים וַאֲנַחְנוּ בְּשֵׁם־ה' אֱלֹקינוּ נַזְכִּיר:
ט הֵמָּה כָּרְעוּ וְנָפָלוּ וַאֲנַחְנוּ קַּמְנוּ וַנִּתְעוֹדָד:
י ה' הוֹשִׁיעָה הַמֶּלֶךְ יַעֲנֵנוּ בְיוֹם־קָרְאֵנוּ:
